زكريا ٨

«هكذا قالَ رَبُّ الجُنودِ: في تِلكَ الأيّامِ يُمسِكُ عشَرَةُ رِجالٍ مِنْ جميعِ ألسِنَةِ الأُمَمِ يتَمَسَّكونَ بذَيلِ رَجُلٍ يَهوديٍّ قائلينَ: نَذهَبُ معكُمْ لأنَّنا سمِعنا أنَّ اللهَ معكُمْ».
زَكَريّا 8:23 AVDDV
زكريا ٨ مليان وعود مفرحة وكله رجاء على عكس الاصحاح اللى قبله .. حسيت ان ربنا طيب قوى .. وبعد ماشد وعاقب وغضب .. رجع يحب ويطبطب تانى .. اول مره الاحظ بنفسى حب ربنا وطيبة قلبه .. الحقيقة انا فرحت وجالى رجاء لما قرأت الاصحاح ده .. وكنت محتارة فى اختيار اية النهارده .. لحد ماوصلت لاخر الاصحاح ولقيت الآيه دى .. الآيه دى فرقت معايا ولفتت نظرى لان فيها كرازة .. ربنا حيسمح للناس تمشى ورانا واحنا نقودهم لانهم حيشوفوا المسيح فينا .. احنا حييجى لنا وقت ونقدر نعكس صورة المسيح .. مش بس كده .. ده فيه ناس حتيجى لربنا وتدخل حضنه بسببنا وعن طريقنا .. الرجاء هنا مضاعف .. والوعد مفرح جداً .. ربنا ينعم علينا برضاه ويفرح قلوبنا بحضنه ويدينا رجاء بوعوده ..

زكريا ٧

بل جَعَلوا قَلبَهُمْ ماسًا لئَلّا يَسمَعوا الشَّريعَةَ والكلامَ الّذي أرسَلهُ رَبُّ الجُنودِ بروحِهِ عن يَدِ الأنبياءِ الأوَّلينَ. فجاءَ غَضَبٌ عظيمٌ مِنْ عِندِ رَبِّ الجُنودِ.
زَكَريّا 7:12 AVDDV
12 Yes, they made their hearts like flint, refusing to hear the law and the words which the Lord of hosts had sent by His Spirit through the former prophets. Thus great wrath came from the Lord of hosts. (Zechariah 7:12)
المهمة هى البحث عن وعود الله فى سفر زكريا .. المفروض انى اقرأ اصحاح كل يوم ولما الاقى وعد اكتبه واحفظه او اتأمل فيه .. المهم انى اعيشه واصدقه .. انا بدأت اقرأ فى سفر زكريا من اول الشهر .. وسفر زكريا ١٤ اصحاح يعنى كنت المفروض اخلصه يوم ١٤ اكتوبر .. لكن المهمة مش بالسهولة دى .. ساعات بالاقى الوعد بسرعة واحس بكلمة ربنا بتخترقنى .. وساعات ماافهمش العربى فاضطر اقرأ بالانجليزى .. ساعات تانية الوعد بيكون مختفى .. زى الاصحاح ده .. فافضل اقرأ فيه مره عربى ومرة انجليزى لحد ماالاقى الوعد .. ده غير ساعات اخرى بيغلبنى الكسل وعدم القدرة على التركيز ..
بس اخيراً لقيت وعد فى اصحاح ٧ .. او انا اعتبرته وعد .. "روح ربنا ترسل كلمته فى الانبياء" .. شئ رائع وجميل ان الواحد يكتشف ويدرك ان روح الرب يتكلم .. مش عارفة .. لكن بالنسبة لى حسيت انه شئ معزى جداً لما ادركت ان كلام ربنا وشريعته مرسلة لى من روحه .. مش بس بتجعل كلام ربنا مقدس ومهم .. لكن كمان فيه رسالة حب واهتمام من ربنا .. انا باشكر ربنا على اهتمامة وكلمته التى لاترجع فارغة ابداً .. الكتاب المقدس اقل مايقال عنه انه بحر عميق مملوء معانى واسرار .. والعمر لايكفى لسبر اغواره ..

زكريا ٦

والبَعيدونَ يأتونَ ويَبنونَ في هَيكلِ الرَّبِّ، فتعلَمونَ أنَّ رَبَّ الجُنودِ أرسَلَني إلَيكُمْ. ويكونُ، إذا سمِعتُمْ سمَعًا صوتَ الرَّبِّ إلهِكُمْ».
زَكَريّا 6:15 AVDDV
15 Even those from afar shall come and build the temple of the Lord. Then you shall know that the Lord of hosts has sent Me to you. And this shall come to pass if you diligently obey the voice of the Lord your God.” (Zechariah 6:15)
وعد حلو للخدام والكارزين .. البعيدين حييجوا .. حيرجعوا .. البعيدين .. الخطاه .. صغار النفوس .. الملحدين .. المدمنين .. القاتلين .. السارقين .. كل واحد بعيد لسبب او لاخر حيرجع .. حيشوف ربنا .. حيفرح بربنا .. قلبه حيرتاح فى ربنا .. بس فيه شرط .. اذا سمعوا سمعاً صوت ربنا .. فى الترجمة الانجليزى بتقول
"And this shall come to pass if you diligently obey the voice of the Lord your God.”
"Diligently obey"
معناها نسمع كلمة ربنا وننفذها ونلتزم بها بكل دقة .. لو احنا بنعتبر نغسنا فعلاً كارزين وخدام لازم الاول نلتزم بكلمة ربنا بشدة لان ده الشرط الوحيد اللى حيخلى البعيدين يرجعوا .. ربنا يرحمنا .. ارحمنا يارب ..

زكريا ٥

انا مافهمتش قوى الاصحاح ده .. بس قريته كذا مره .. بالعربى وبالانجليزى .. لحد مالقيت وعد ..
وإذا بوَزنَةِ رَصاصٍ رُفِعَتْ. وكانتِ امرأةٌ جالِسَةٌ في وسَطِ الإيفَةِ. فقالَ: «هذِهِ هي الشَّرُّ». فطَرَحَها إلَى وسَطِ الإيفَةِ، وطَرَحَ ثِقلَ الرَّصاصِ علَى فمِها.
زَكَريّا 5:7-8 AVDDV
اللى فهمته ان ربنا حيساعدنا نتخلص من كل شر وكل شبه شر جوانا .. وفهمت كمان ان ربنا حيسكت الشيطان الكداب .. وابو الكداب .. ربنا وضع ثقل رصاص على فم الشيطان علشان يخرسه ولا يدعه يتكلم بالشرور فى قلوبنا .. ولايبث شكوكه فى عقولنا وافكارنا ..
ارحمنى يارب من الشكوك والافكار الشريرة .. اخرس الشيطان اللى بيبث سمومه فى عقلى وقلبى .. انعم على بنعمة التمييز وادينى حكمة تخلينى اعرف افرق بين صوتك وصوته .. بين دعوتك ووعدك وبين دعوته ورغبته فى هلاكى ..

زكريا ٤

فأجابَ وكلَّمَني قائلًا: «هذِهِ كلِمَةُ الرَّبِّ إلَى زَرُبّابِلَ قائلًا: لا بالقُدرَةِ ولا بالقوَّةِ، بل بروحي قالَ رَبُّ الجُنودِ. مَنْ أنتَ أيُّها الجَبَلُ العظيمُ؟ أمامَ زَرُبّابِلَ تصيرُ سهلًا! فيُخرِجُ حَجَرَ الزّاويَةِ بَينَ الهاتِفينَ: كرامَةً، كرامَةً لهُ».
زَكَريّا 4:6-7

الجبل عظيم وكبير قوى يارب .. جبل خطيتى .. جبل مشاكلى .. جبل صغر نفسى .. جبل شهواتى ورغباتى .. جبل الانسان العتيق .. وانت قلت يارب .. "لا بالقدرة ولابالقوة .. بل بروحك" وانا قلت لك يارب ولا عندى قوة ولا املك قدرة .. انا محتاجة لك يارب .. محتاجة منك روح الحكمة .. روح القوة .. روح المحبة .. روح النصح والارشاد .. انا ماليش غيرك يارب .. ماليش غيرك .. انت ملجأى .. انت رجائى .. انت املى .. انت قوتى .. انت سندى .. وانا عندى اكتر من جبل فى حياتى .. لكن انت وعدت ان اى جبال عظيمة تصير امامك سهلاً .. انا مستنية وعدك يارب .. انت حتيجى وحتخلصنى من الجبال اللى فى حياتى .. حتيجى وتفرح قلبى بيك .. علمنى انتظرك يارب .. علمنى اثق فى وعودك .. يارب اعن عدم ايمانى ..

زكريا ٣

فقالَ الرَّبُّ للشَّيطانِ: «ليَنتَهِركَ الرَّبُّ يا شَيطانُ! ليَنتَهِركَ الرَّبُّ الّذي اختارَ أورُشَليمَ! أفَليس هذا شُعلَةً مُنتَشَلَةً مِنَ النّارِ؟».
زَكَريّا 3:2
انتهر الشيطان يارب .. انتهر الشيطان .. انت الوحيد اللى تقدر عليه .. انتهر افكارى السلبية اللى بيحطها فى دماغى .. انتهر صغر النفس واليأس اللى بيزرعهم فى قلبى .. انت اخترتنى يارب .. اخترتنى اكون بنتك .. اخترتنى اخدمك .. ائتمنتنى على خرافك الضالة .. اعنى يارب وارحمنى .. لانى ليس فى قوه لتنتهر الشيطان .. انت قوتى يارب .. انتهر الشيطان يارب ..

فأجابَ وكلَّمَ الواقِفينَ قُدّامَهُ قائلًا: «انزِعوا عنهُ الثّيابَ القَذِرَةَ». وقالَ لهُ: «انظُرْ. قد أذهَبتُ عنكَ إثمَكَ، وأُلبِسُكَ ثيابًا مُزَخرَفَةً». فقُلتُ: «ليَضَعوا علَى رأسِهِ عِمامَةً طاهِرَةً». فوَضَعوا علَى رأسِهِ العِمامَةَ الطّاهِرَةَ، وألبَسوهُ ثيابًا ومَلاكُ الرَّبِّ واقِفٌ.
زَكَريّا 3:4-5
انزع عنى خطيتى يارب .. امتى يارب حتنزع عنى اثمى؟! امتى حتيجى وتلبسنى ثياب نعمتك الزخرفة؟! تعال يارب وضع على رأسى اكليل .. انا صحيح لا استحق اى اكاليل .. لكن عندى رجاء فيك .. عندى امل فى عطفك وغفرانك .. ارحمنى يارب وانظر الى ذلى وتعبى ..

زكريا ٢

فقالَ لهُ: «اجرِ وكلِّمْ هذا الغُلامَ قائلًا: كالأعراءِ تُسكَنُ أورُشَليمُ مِنْ كثرَةِ النّاسِ والبَهائمِ فيها. وأنا، يقولُ الرَّبُّ، أكونُ لها سورَ نارٍ مِنْ حَوْلِها، وأكونُ مَجدًا في وسَطِها.
زَكَريّا 2:4-5 AVDDV
ما معنى كلمة (اعراء)؟! معناها البلد او المدينة التى ليس لديها سور!! يعنى مكشوفة غير محمية!! وهل هذا يعتبر وعد من ربنا؟! ايه الوعد الغريب ده؟! المدينة لا تحتاج سور لان الرب هو السور .. سور من "نار" .. وايه علاقة الوعد ده بينا؟!
احنا اورشليم .. وربنا بيوعدنا بخير كتير .. "ناس" و"بهائم" .. ثروة الناس زمان كانت تقاس بعدد البهائم .. لكن هل نحن نبحث عن مال وجاه وعزوة؟! هذه اشياء ارضية تطلبها الامم .. لكن احنا ثروتنا الحقيقية فى وعد ربنا لنا .. حنكسب نفوس لربنا .. ثروتنا الحقيقية فى الشبع من ربنا ونعمته .. سلامه ومحبته ..
احنا مش محتاجين "سور" نحصن نفسنا به .. مش محتاجين سلطة او واسطة تسهل لنا حياتنا وخدمتنا .. مش محتاجين حماية او تأمين من بشر علشان نروح نخدم ونوصل كلمة ربنا للبعيدين .. ربنا هو السور .. ربنا هو النار اللى بتحوط على اولاده وخدامه علشان يحميهم .. ربنا هو المجد وسط اولاده .. حيفرح قلبهم بالثمر .. وحينقى قلبهم بالنعمة .. لك كل المجد يارب

زكريا ١

فقُلْ لهُمْ: هكذا قالَ رَبُّ الجُنودِ: ارجِعوا إلَيَّ، يقولُ رَبُّ الجُنودِ، فأرجِعَ إلَيكُمْ، يقولُ رَبُّ الجُنودِ.
زَكَريّا 1:3 AVDDV
رجعنى ليك يارب .. انا تايهه ومش عارفة ارجع يارب .. عرفنى سكتك يارب .. نور لى طريقك .. نفسى ارجع لك .. بس مش عارفة .. كل ما اجى اقرب منك خطوة .. ارجعها ميت خطوة .. رجعنى ليك يارب ..

لذلكَ هكذا قالَ الرَّبُّ: قد رَجَعتُ إلَى أورُشَليمَ بالمَراحِمِ فبَيتي يُبنَى فيها، يقولُ رَبُّ الجُنودِ، ويُمَدُّ المِطمارُ علَى أورُشَليمَ.
زَكَريّا 1:16 AVDDV
ساعات باحس انك سامعنى .. ويمكن كمان بترد على .. اعن عدم ايمانى يارب .. انزع القلب الحجر وادينى قلب لحم .. قلب الطفلة .. اللى بتصدق فى وعودك وبتفضل مستنياها مهما اتأخرت .. مستنياك يارب .. مستنياك ترجع لى .. مستنياك ترحمنى .. تعال يارب .. تعال وابنى بيتك فى قلبى .. ثبته على الصخر .. فلا يتزعزع ابداً .. احفر كلامك جوة قلبى .. علمنى اتمسك بوعودك .. علمنى انتظرك يارب ..